വിമർശകരെ ഞെട്ടിച്ച 10 പ്രഖ്യാപനങ്ങൾ; വിജയ് സർക്കാർ കയ്യടി നേടുന്നത് എന്തുകൊണ്ട്?
വിമർശകരെ ഞെട്ടിച്ച 10 പ്രഖ്യാപനങ്ങൾ; വിജയ് സർക്കാർ കയ്യടി നേടുന്നത് എന്തുകൊണ്ട്?
admin
ചെന്നൈ: ആറ് പതിറ്റാണ്ടുകൾക്ക് ശേഷം തമിഴ്നാട്ടിൽ ആദ്യമായി ദ്രാവിഡ പാർട്ടികളെ പുറത്തിരുത്തി വിജയ് നയിക്കുന്ന തമിഴക വെട്രി കഴകം (ടിവികെ) അധികാരം സ്വന്തമാക്കി. മെയ് 10ന് വിജയ് തമിഴ്നാട് മുഖ്യമന്ത്രിയായി സത്യപ്രതിജ്ഞ ചെയ്ത് അധികാരമേറ്റെങ്കിലും വിജയ് സർക്കാർ അധികകാലം തുടരില്ലെന്ന വിലയിരുത്തൽ ശക്തമായിരുന്നു.
വിജയ് മുഴുവൻ കാലാവധിയും പൂർത്തിയാക്കില്ലെന്ന് ചില നേതാക്കൾ അവകാശപ്പെടുകയും സർക്കാർ വീഴുമെന്നും അഭ്യൂഹം ശക്തമായെങ്കിലും വിജയ് സർക്കാർ കയ്യടി നേടി മുന്നോട്ട് പോകുകയാണെന്നാണ് റിപ്പോർട്ടുകൾ പറയുന്നത്. വിജയ് മുഖ്യമന്ത്രിയായിട്ട് ഒരു മാസത്തിലേറെയായി. ഇതുവരെ വിജയ് സർക്കാർ സ്വീകരിച്ച നടപടികൾ പൊതുജനങ്ങൾക്ക് ശരിയായ സന്ദേശം നൽകുന്നുണ്ടെന്നാണ് വിലയിരുത്തൽ.
കുറ്റവാളികൾക്കെതിരെ രാഷ്ട്രീയ ഇടപെടലില്ലാതെ നിർഭയമായ നടപടി സ്വീകരിക്കണമെന്ന വിജയ് സർക്കാരിൻ്റെ നിർദേശവും തമിഴ്നാട്ടിലെ എല്ലാ പൊതുഗതാഗത ബസുകളിലും എയർ കണ്ടീഷൻ ചെയ്യുമെന്ന പ്രഖ്യാപനവും കയ്യടി നേടി. സംസ്ഥാനത്തെ എല്ലാ പൊതുഗതാഗത ബസുകളിലും എയർ കണ്ടീഷൻ ചെയ്യുമെന്ന് പ്രഖ്യാപിച്ചുകൊണ്ട് ജില്ലാ കളക്ടർമാർക്കും പോലീസ് മേധാവികൾക്കും വിജയ് സർക്കാർ ബന്ധപ്പെട്ട നിർദേശങ്ങൾ കൈമാറി.
അധികാരമേറ്റ് മണിക്കൂറുകൾക്കുള്ളിൽ വിജയ് 200 യൂണിറ്റ് സൗജന്യ വൈദ്യുതി പ്രഖ്യാപിച്ചു. ഈ തീരുമാനം സംസ്ഥാനത്തെ ഏകദേശം 2.4 കോടി ഗാർഹിക വൈദ്യുതി കണക്ഷൻ ഉടമകൾക്ക് ഗുണം ചെയ്യും. മയക്കുമരുന്ന് കടത്ത്, വിൽപ്പന, ഉപയോഗം എന്നിവ തടയുകയും കർശനമായി ശിക്ഷിക്കുകയും ചെയ്യുക എന്ന ലക്ഷ്യത്തോടെ തമിഴ്നാട്ടിലെ എല്ലാ ജില്ലകളിലും ആന്റി - ഡ്രഗ് ടാസ്ക് ഫോഴ്സ് ആരംഭിച്ചു. ഈ ടാസ്ക് ഫോഴ്സ് താൻ നേരിട്ട് നിരീക്ഷിക്കുമെന്ന് വിജയ് ഉറപ്പുവരുത്തി.
സ്ത്രീകൾക്കായി പ്രത്യേക ടാസ്ക് ഫോഴ്സ് മുഖ്യമന്ത്രി രൂപീകരിക്കുകയും അതിന് 'സിങ്കപ്പെൺ' സ്പെഷ്യൽ ടാസ്ക് ഫോഴ്സ് എന്ന് പേരിടുകയും ചെയ്തു. സ്ത്രീകൾക്കും കുട്ടികൾക്കുമെതിരായ കുറ്റകൃത്യങ്ങൾ തടയുക, ദ്രുത നടപടികളും പരാതികളിൽ വേഗത്തിലുള്ള പരിഹാരവും ഉറപ്പാക്കുക എന്നിവയായിരുന്നു ലക്ഷ്യം.
അധികാരത്തിലെത്തി 48 മണിക്കൂറിനുള്ളിൽ സംസ്ഥാനത്തെ ആരാധനാലയങ്ങൾ, വിദ്യാഭ്യാസ സ്ഥാപനങ്ങൾ, സംസ്ഥാനത്തുടനീളമുള്ള ബസ് സ്റ്റാൻഡുകൾ എന്നിവയ്ക്ക് സമീപം പ്രവർത്തിക്കുന്ന 717 തമിഴ്നാട് സ്റ്റേറ്റ് മാർക്കറ്റിങ് കോർപറേഷന്റെ (ടാസ്മാക്) റീട്ടെയിൽ ഔട്ട്ലെറ്റുകൾ അടച്ചുപൂട്ടാൻ വിജയ് ഉത്തരവിട്ടു. രണ്ടാഴ്ചയ്ക്കുള്ളിൽ ക്ഷേത്രങ്ങൾ, പള്ളികൾ, സ്കൂളുകൾ, കോളേജുകൾ, ബസ് സ്റ്റാൻഡുകൾ എന്നിവയുടെ 500 മീറ്റർ ചുറ്റളവിൽ പ്രവർത്തിക്കുന്ന എല്ലാ സർക്കാർ ഉടമസ്ഥതയിലുള്ള മദ്യവിൽപ്പനശാലകളും അടച്ചുപൂട്ടാൻ നിർദേശിച്ചു. ഇതോടെ മതപരമായ സ്ഥലങ്ങൾക്ക് സമീപമുള്ള 276 മദ്യശാലകളും, സ്കൂളുകൾക്കും കോളേജുകൾക്കും സമീപമുള്ള 186 എണ്ണവും, ബസ് ടെർമിനലുകൾക്ക് സമീപമുള്ള 255 മദ്യശാലകളും അടച്ചുപൂട്ടി. പൊതുസമ്മേളന സ്ഥലങ്ങൾ മദ്യപാനികളിൽ നിന്ന് മുക്തമാക്കുമെന്ന തന്റെ വാഗ്ദാനം വിജയ് നിറവേറ്റി.
